Yaponiyada temperatur 40 dərəcəni keçib

Yaponiyanın mərkəzi hissəsində yerləşən üç şəhərdə havanın temperaturu çərşənbə axşamı 40 dərəcə Selsini ötüb. Bu, Yaponiya Meteorologiya Agentliyinin yeni istilik xəbərdarlığı kateqoriyasını tətbiq etməsindən sonra ölkədə ilk rəsmi “kokuşobi” (“sərt isti gün”) halı olub.

"Stabil.az" xəbər verir ki, “Kyodo” agentliyinin məlumatına görə, Gifu prefekturasındakı Tayimi və Quyo şəhərlərində müvafiq olaraq 40,3 dərəcə və 40 dərəcə Selsi temperatur qeydə alınıb, qonşu Ayçi prefekturasındakı Toyoda isə 40,1 dərəcə səviyyəsinə çatıb.

Aprel ayında tətbiq edilən “kokuşobi” termini temperaturun ən azı 40 dərəcə Selsi səviyyəsinə çatdığı günlərə aiddir və həyati təhlükə yaradan istilik şəraiti barədə ictimaiyyətin məlumatlılığını artırmaq məqsədi daşıyır.

Meteorologiya agentliyi bildirib ki, bazar günündən bəri Yaponiya arxipelaqının böyük hissəsini əhatə edən güclü yüksək təzyiq sistemi həm səthi, həm də yuxarı səviyyəli havanı isidib və temperaturu kəskin şəkildə artırıb.

Günortadan sonra Yaponiyanın 914 hava müşahidə məntəqəsindən 731-də maksimum 30 dərəcə və daha yüksək temperatur qeydə alınıb. Bunlardan 272-si “moşobi” və ya “həddindən artıq isti günlər, üç şəhərdə isə 40 dərəcə göstəricisi ayrıca “kokuşobi” kimi təsnif edilib.

“Kyodo”nun məlumatına görə, digər böyük şəhərlərdə də anomal istilər müşahidə olunub. Naqoyada temperatur 39,7 dərəcə, Saytama prefekturasında isə 38,6 dərəcə Selsi olub.

Meteorologiya agentliyi çərşənbə günü Yaponiyanın bir çox yerində təhlükəli dərəcədə yüksək temperaturun davam edəcəyi barədə xəbərdarlıq edib və sakinləri isti hava ilə əlaqəli xəstəliklərə qarşı tədbirlər görməyə, o cümlədən susuz qalmamağa, uzun müddət açıq havada gəzməməyə və mümkün olduqda kondisionerdən istifadə etməyə çağırıb.

Stabil.Az