SOCAR və "Elektroprivreda Serbiya" EPS şirkəti Nişdə qaz elektrik stansiyasının tikintisi ilə bağlı müqavilə imzalayıb

SOCAR və Serbiyanın "Elektroprivreda Serbiya" (EPS) şirkəti Niş şəhərində qaz elektrik stansiyasının inkişafı, tikintisi və idarə olunmasını nəzərdə tutan əməkdaşlıq müqaviləsi bağlayıblar.

"Stabil.az" bu barədə Serbiyanın "Elektroprivreda" şirkətinə istinadən məlumat verib.

Bildirilib ki, sənədi EPS şirkətinin baş direktoru Duşan Jivkoviç və SOCAR-ın prezidenti Rövşən Nəcəf Bakıda keçirilən Enerji Həftəsi çərçivəsində imzalayıblar.

Serbiyanın mədənçilik və energetika naziri Dubravka Cedoviç Handanoviç bildirib ki, iki şirkət arasında bu sənədin imzalanması Serbiyanın enerji təhlükəsizliyini əlavə olaraq möhkəmləndirəcək, enerji mənbələrinin diversifikasiyasına və yaşıl keçidə töhfə verəcək layihənin həyata keçirilməsində mühüm addımdır: "Məqsəd 2030-cu ildə quraşdırılmış gücü 500 MVt-a qədər olan yeni baza enerjisi istehsal gücünün şəbəkədə olmasıdır".

O vurğulayıb ki, SOCAR ilə əməkdaşlıq Serbiya və Azərbaycanın energetika sahəsində güclü tərəfdaşlığını təsdiqləyir və qarşılıqlı əhəmiyyət daşıyan yeni birgə layihələr üçün imkanlar açır.

Nazir vurğulayıb ki, bu layihə ilə EPS öz istehsal portfelinin transformasiyasını davam etdirir və vətəndaşların, iqtisadiyyatın elektrik enerjisi ilə sabit və etibarlı təchizatı üçün imkanlarını gücləndirir: "SOCAR ilə tərəfdaşlıq bizə Serbiyanın elektroenergetika sisteminin uzunmüddətli dayanıqlığına töhfə verəcək müasir enerji obyektini həyata keçirmək üçün təcrübə və resursları birləşdirməyə imkan verir".

Stabil.Az