Qadın futbolunda ilk klublararası dünya çempionatı keçiriləcək

Qadın futbolunda yeni mərhələ başlayır. FIFA ilk dəfə qadın klubları arasında klublararası dünya çempionatının təşkil ediləcəyini rəsmi şəkildə açıqlayıb. Turnir 2028-ci ilin 5–30 yanvar tarixlərində keçiriləcək və bundan sonra dörd ildən bir təşkil olunacaq. Bu yarış, FIFA-nın 2026-cı ildən etibarən hər il keçirməyi planlaşdırdığı “FIFA Women's Champions Cup”un daha genişmiqyaslı versiyası olacaq.

"Stabil.az" AZƏRTAC-a istinadən xəbər verir ki, turnirdə 16 komanda iştirak edəcək. Avropadan ən azı 5 klub yer alacaq, Şimali və Cənubi Amerika, Afrika və Asiyadan isə hər qitədən 2 komanda yarışacaq. Digər iştirakçılar müxtəlif konfederasiyalar arasında keçiriləcək seçmə mərhələlərin nəticəsinə əsasən müəyyənləşəcək.

Turnirin yanvar ayında keçirilməsi ciddi müzakirələrə səbəb olub, çünki bu dövr Avropa liqalarının aktiv perioduna düşür. İngiltərə, Avstraliya, Meksika və Yaponiya çempionatlarının qrafikində pozuntuların yaranacağı gözlənilir. Artıq sıx olan qadın futbolu təqvimi bu qərarla daha da sıxlaşacaq. Futbol Azarkeşləri Assosiasiyasının (FSA) qadın futbolu üzrə rəhbəri Debora Dilvort narahatlığını rəsmi qurumlara çatdırıb.

Turnirin keçirilmə yeri hələ rəsmən açıqlanmasa da, Qətər əsas namizədlərdən biri kimi göstərilir. 2022-ci ildə kişilər arasında dünya çempionatına, ötən il isə İnterkontinental Kuboka ev sahibliyi etmiş Qətər, əlverişli hava şəraiti, müasir stadionları və FIFA ilə yaxın əlaqələri səbəbindən favorit hesab olunur. Qətər həmçinin 2026-cı ilin sonunda planlaşdırılan “Finalissima” oyunu üçün də əsas namizədlərdən biridir.

Lakin Qətərin ev sahibliyi ehtimalı bəzi etirazlara səbəb olub. Ölkədə qadın futbolunun inkişafının zəif olması əsas arqument kimi göstərilir. Qətərin qadın milli komandası 2009-cu ildə yaradılıb, lakin 2014-cü ildən etibarən rəsmi oyun keçirməyib və hazırda FIFA reytinqində yer almır.

Qeyd olunur ki, 2029-cu ildə kişilər arasında keçiriləcək 32 komandalı klublararası dünya çempionatı yay aylarında planlaşdırıldığı üçün Qətərin həmin turnirdə ev sahibliyi şansı azdır. Lakin qadınlar turnirinin qış aylarında keçirilməsi Qətərin şansını artırır.

Bu qərarın qadın futbolunun qlobal inkişafına təkan verib-verməyəcəyi və ya təqvim sıxlığı səbəbindən yeni mübahisələr yaradıb-yaratmayacağı futbol ictimaiyyəti üçün maraq doğuran əsas məsələdir.

Stabil.Az