Ötən gün narkotiklərlə bağlı 35 fakt aşkar edilib

İyunun 4-də hüquq-mühafizə orqanları tərəfindən 70 cari, 7 isə əvvəlki dövrlərdən bağlı qalan cinayətin açılması ilə yanaşı, narkotiklərlə bağlı 35 fakt aşkarlanıb.

"Stabil.az" bu barədə Daxili İşlər Nazirliyinin mətbuat xidmətinə istinadən məlumat verib.

Həmçinin bildirilib ki, axtarışda olduğuna görə ümumilikdə 176, o cümlədən borclu şəxs qismində axtarışda olan 139, ailə üzvlərini məlumatlandırmadan yaşadığı ünvanı tərk etdiyinə görə itkin düşmüş kimi axtarışı aparılan 6 və dələduzluğa görə axtarışda olan 14 nəfər saxlanılaraq aidiyyəti üzrə təhvil verilib.

Narkotiklərlə əlaqəli 35 fakt müəyyən olunub. Polis əməkdaşlarının keçirdikləri əməliyyat tədbirləri ilə ümumi çəkisi 24,4 kiloqrama yaxın narkotik vasitə və kultivasiya yolu ilə yetişdirilmiş 50 ədəd çətənə kolu aşkarlanaraq götürülüb, yabanı halda bitmiş 12,8 ton çəkidə 21 min 783 ədəd çətənə kolu isə aşkarlanaraq məhv edilib.

Eləcə də qanunsuz saxlanılan silah-sursatın götürülməsi və aşkarlanması ilə bağlı 8 fakt müəyyən olunub. Paytaxt və respublikanın ayrı-ayrı rayonlarında 4 avtomat silahı, 1 tapança, 17 tüfəng, 3 patron darağı və 119 müxtəlif çaplı patron aşkar edilərək götürülüb.

Cinayət törətməkdə şübhəli bilinən 80 nəfər də saxlanılıb.

Stabil.Az