Neapolda tarixi Sannazaro Teatrı yanıb

İtaliyanın Neapol şəhərindəki tarixi Sannazaro Teatrı yanğın nəticəsində tamamilə məhv olub.

"Stabil.az" “Reuters” agentliyinə istinadla xəbər verir ki, yanğın Çiaya rayonundakı bir yaşayış binasında başlayaraq sürətlə yaxınlıqdakı XIX əsrə aid teatra yayılıb. Teatrın günbəzli damı, dəbdəbəli köşkləri və qızılı pillələri dağılıb.

Neapolun yanğınsöndürmə komandasının rəisi Cüzeppe Paduano bildirib ki, teatrın çox az hissəsi qalıb və hələ ki, bəzi kiçik qaynar nöqtələr söndürülür. Mer Qaetano Manfredi yanğının təsadüfən baş verdiyini qeyd edib və teatrın itirilməsini şəhərin tarixi və mədəniyyəti üçün “dərin yara” adlandırıb.

Sakinlərin məlumatına görə, tüstü məhəlləni bürüyüb, 22 ailə təxliyə olunub, 4 nəfər zəhərlənmə səbəbindən xəstəxanaya aparılıb.

1847-ci ildə açılan Sannazaro Teatrı İtaliyanın məşhur aktyor və dramaturqlarını qəbul edib, hazırkı proqramında klassik musiqi konsertləri ilə səhnə əsərlərini birləşdirirdi. Tarixi teatrların yanğınlarla üzləşməsi İtaliyada əvvəllər də baş verib: 30 il əvvəl Venesiyada Fenice Opera Evi, 1991-ci ildə Bari şəhərində Teatro Petruzzelli yanğın nəticəsində məhv olmuşdu.

Stabil.Az