İran atəşkəs üçün ABŞ-yə müraciət edib

ABŞ Prezidenti Donald Tramp bildirib ki, İran atəşkəs məqsədilə ABŞ-yə müraciət edib.

"Stabil.az" xəbər verir ki, bu barədə ABŞ Prezidenti Donald Tramp özünün sosial şəbəkə səhifələrində yazıb.

Onun sözlərinə görə, İranın yeni rəhbərləri sələflərindən "xeyli ağıllıdırlar".

"İndicə İran ABŞ-dən atəşkəs istəyib. Hörmüz boğazı açıq, azad və təhlükəsiz olduqda biz bunu nəzərdən keçirəcəyik. O vaxta qədər biz İranı məhv edir, necə deyərlər, daş dövrünə qaytarırıq", - ABŞ lideri yazıb.

Xatırladaq ki, ABŞ və İsrail fevralın 28-də İrana qarşı hərbi əməliyyatlara başlayıb. Nəticədə İranın ali rəhbəri ayətullah Əli Xamenei və bir sıra yüksək vəzifəli şəxslər öldürülüb. Bundan sonra İran İsraillə yanaşı, ABŞ və müttəfiqlərinin hərbi bazalarının yerləşdiyi Səudiyyə Ərəbistanı, Qətər, Birləşmiş Ərəb Əmirlikləri, Oman, Bəhreyn, İraq və Kiprdə müəyyən etdiyi hədəflərə zərbələr endirməyə başlayıb.

Stabil.Az