Fransada mənzil problemi kəskinləşir

Fransada mənzil böhranı getdikcə dərinləşir. Mənzil imkanları məhdud olan şəxslər üçün fəaliyyət göstərən fondun açıqladığı “Fransada qeyri-kafi mənzil şəraitinin vəziyyəti” adlı illik hesabata əsasən, ölkədə 4 milyon 200 min nəfər ya mənzilsizdir, ya da yaşayış üçün uyğun olmayan şəraitdə yaşayır.

"Stabil.az" xəbər verir ki, hesabatda müxtəlif vəziyyətlər fərqləndirilib. Təxminən 1 milyon 18 min nəfərin yaşayış yeri yoxdur. Onların 350 mini tam mənzilsiz sayılır və ya küçədə yaşayır, ya da təcili sığınacaqlarda və ixtisaslaşmış mərkəzlərdə yerləşdiriliblər.

Bununla yanaşı, 2 milyon 874 min nəfər komfortsuz evlərdə yaşayırlar. Bu evlərdə vacib olan infrastruktur yoxdur. Digər 1 milyon 128 min nəfər isə həddindən artıq sıxlıq şəraitində yaşayır.

12,3 milyon insan risk altındadır

Məlumata görə, mənzil böhranı daha geniş əhali qrupunu da təsir altına alır. Ümumilikdə 12,3 milyon insan kirayə borclarının yığılması, enerji böhranı və ya mənzillə bağlı ağır maliyyə yükü səbəbindən ciddi risk altındadır.

Paralel olaraq yayımlanan əlavə göstəricilər sosial mənzilə tələbatın artmaqda davam etdiyini göstərir. Hazırda Fransada 2,7 milyondan çox ailə sosial mənzil üçün növbədədir. Eyni zamanda, yeni sosial mənzillərin tikintisi kəskin şəkildə azalır: 2024-cü ildə təxminən 84 min sosial mənzil maliyyələşdirilib, halbuki 2016-cı ildə bu rəqəm 124 min idi.

Enerji böhranı dərinləşir

Hesabatda enerji böhranının artması da xüsusi vurğulanır. 2024-cü ildə fransız ailələrinin 30 faizi evində soyuqdan əziyyət çəkdiyini bildirib. Müqayisə üçün qeyd olunur ki, bu göstərici 2020-ci ildə cəmi 14 faiz idi.

Fond hər il bu hesabatı dərc etməklə Fransada mənzil şəraitinin inkişafını və sosial bərabərsizliklərin dərinləşmə səviyyəsini göstərir. Açıqlanan son rəqəmlər isə mənzil məsələsinin ölkə üçün getdikcə daha ciddi sosial problemə çevrildiyini göstərir.

Stabil.Az