Banqladeşdə ilk dəfə devrilmiş hakimiyyət sonrası parlament seçkiləri keçirilir

Fevralın 12-də Banqladeşdə seçicilər xalq üsyanının “Avami Liqası” partiyasının 15 illik hakimiyyətinə son qoymasından sonra ilk dəfə yeni hökumət seçmək üçün seçki məntəqələrinə üz tutublar.

"Stabil.az" xarici mediaya istinadla xəbər verir ki, ölkədə 127,6 milyondan çox insan səs vermək hüququna malikdir və eyni zamanda Konstitusiya islahatları ilə bağlı referendumda da qərarlarını verəcəklər. Səsvermənin ilkin nəticələrinin axşam saatlarında açıqlanması gözlənilir.

Banqladeş vətəndaşları ölkə üzrə 42.000 seçki məntəqəsində 300 parlament üzvünü seçirlər. Parlament yerləri uğrunda 51 siyasi partiya və 2034 namizəd, o cümlədən 275 müstəqil namizəd mübarizə aparır. Namizədlərin birbaşa seçildiyi 300 yerə əlavə olaraq, qadınlar üçün ayrılmış 50 yer də var və bununla parlamentin ümumi sayı 350 nəfərə çatır.

Seçki dairələrinin 90%-dən çoxunda müşahidə kameraları quraşdırılıb, ciddi təhlükəsizlik tədbirləri görülür. Asayişin qorunması üçün təxminən 958.000 hüquq-mühafizə əməkdaşı və 100.000 əsgər səfərbər edilib. Bir seçki dairəsində namizədin vəfat etməsi səbəbindən səsvermə dayandırılıb.

Devrilmiş Baş nazir Şeyx Hasinanın “Avami Liqası” partiyasının seçkilərdən kənarlaşdırılmasından sonra əsas namizədlər Banqladeş Milliyyətçi Partiyasının rəhbərlik etdiyi koalisiya və “Camaatı-İslami” partiyasıdır.

Stabil.Az