Azərbaycanlı boksçular Qazaxıstanda keçirilən beynəlxalq turnirdə qızıl medal qazanıblar

Azərbaycanın iki boksçusu Qazaxıstanda U-15 yaş kateqoriyasında təşkil olunan beynəlxalq turnirdə qızıl medal qazanıb.

"Stabil.az" Azərbaycan Boks Federasiyasına istinadən xəbər verir ki, Qazaxıstanın Akmola vilayətinin Qorğaljın rayonunda təşkil olunan yarışda 5 ölkənin idmançıları mübarizə aparıblar.

Turnirə 2 boksçu ilə qatılan Azərbaycan millisinin hər iki üzvü fəxri kürsünün ən yüksək pilləsinə qalxıb.

Sərxan Haqverdiyev (70 kq) və Teymur Tanrıverdiyev (+70 kq) bütün rəqiblərini üstələyərək çempion olublar. Ölkə təmsilçiləri finalda yerli boksçularla görüşü vaxtından əvvəl tam üstünlüklə başa vurublar.

Qeyd edək ki, komandanın çalışdırıcısı Etibar Abdullayev turnirin ən yaxşı məşqçisi seçilib.

Stabil.Az