Azərbaycanda sənaye müəssisələrinin istehsalı artıb

Azərbaycanda sənaye müəssisələri və bu sahədə fəaliyyət göstərən fərdi sahibkarlar 2026-cı ilin yanvar ayında 4,7 milyard manatlıq sənaye məhsulu istehsal ediblər ki, bu da əvvəlki ilin yanvar ayı ilə müqayisədə 2,5% çoxdur.

"Stabil.az" Dövlət Statistika Komitəsinə istinadən xəbər verir ki, neft-qaz sektorunda məhsul istehsalı 1,4 faiz, qeyri neft-qaz sektorunda isə 8,7% artıb.

Sənaye məhsulunun 56,4 faizi mədənçıxarma sektorunda, 35,2%-i emal sektorunda, 7,4%-i elektrik enerjisi, qaz və buxar istehsalı, bölüşdürülməsi və təchizatı sektorunda, 1%-i isə su təchizatı, tullantıların təmizlənməsi və emalı sektorunda istehsal olunub.

Məlumata görə, hesabat dövründə mədənçıxarma sektorunda əmtəəlik neft hasilatı 2,3 faiz azalıb, əmtəəlik qaz hasilatı isə 8,7 faiz artıb.

Stabil.Az