Avstraliya Yaxın Şərqə SAS xüsusi təyinatlı qüvvələrini yerləşdirib

İran ətrafında gərginliyin artacağı ehtimalı səbəbindən Avstraliya SAS elit qüvvələrinin bir hissəsini bölgəyə göndərib.

"Stabil.az" xəbər verir ki, bu barədə “The Daily Telegraph” qəzeti məlumat yayıb.

Nəşr qeyd edir ki, yerləşdirmə ictimaiyyətə açıqlama verilmədən həyata keçirilib.

Mənbələrə istinadla bildirilir ki, bölmənin Birləşmiş Ərəb Əmirliklərində yerləşən Əl-Minhad hava bazasında dislokasiya olunduğu ehtimal edilir. Bununla belə, yerləşdirmənin dəqiq yeri və digər təfərrüatlar açıqlanmır.

Qəzetin məlumatına görə, sözügedən qüvvələr döyüş əməliyyatlarında iştirak üçün nəzərdə tutulmayıb. Onların əsas vəzifəsi təhlükəsizliyin təmin edilməsi və zərurət yaranacağı təqdirdə, diplomatik missiya heyəti də daxil olmaqla təxliyə əməliyyatlarının həyata keçirilməsidir.

Avstraliyanın Baş naziri Entoni Albaniz daha əvvəl dəfələrlə bəyan edib ki, ölkəsi Yaxın Şərqdə hərbi əməliyyatlarda iştirak etməyəcək. O vurğulayıb ki, Avstraliya qoşunlarının bölgədəki fəaliyyəti tamamilə müdafiə xarakteri daşıyır və əsas məqsəd Avstraliya vətəndaşlarının, eləcə də xaricdəki obyektlərin təhlükəsizliyinin təmin olunmasıdır.

Stabil.Az