Azərbaycan Milli Xalça Muzeyi Budapeştdə keçirilən beynəlxalq festivalda iştirak edib

Azərbaycan Milli Xalça Muzeyi artıq ikinci ildir ki, Macarıstanın paytaxtı Budapeştdə keçirilən 40-cı Beynəlxalq Xalq Sənətkarları Festivalında ölkəmizi uğurla təmsil edir.

"Stabil.az" AZƏRTAC-a istinadən xəbər verir ki, festival müddətində ziyarətçilər xalçatoxuma və kəlağayı sənəti üzrə ustad dərslərində iştirak edərək, bu sənət nümunələrinin hazırlanma texnologiyaları ilə yaxından tanış olublar. Onlara, həmçinin naxış və rənglərinin semantik mənaları haqqında ətraflı məlumat verilib.

Azərbaycan Milli Xalça Muzeyinin stendində UNESCO-nun Bəşəriyyətin Qeyri-Maddi Mədəni İrs üzrə Reprezentativ Siyahısına daxil edilmiş Azərbaycan xalçaçılıq və kəlağayı sənəti nümunələri, eləcə də bu sənət sahələrinə dair kitablar təqdim olunub.

Muzey festivala Mədəniyyət Nazirliyi, Diasporla İş üzrə Dövlət Komitəsi və Macarıstandakı Azərbaycan Evinin dəstəyi ilə qatılıb.

Stabil.Az